‘मोतीबिंदू मुक्त जळगाव ग्रामीण’ अभियानाला मोठा प्रतिसाद!

६०० लाभार्थ्यांना मोफत चष्म्यांचे वाटप; स्पष्ट दृष्टीसोबत नव्या आशेची भेट

जळगाव | प्रतिनिधी

‘मोतीबिंदू मुक्त जळगाव ग्रामीण‘ या महत्त्वाकांक्षी अभियानांतर्गत आज राज्याचे पाणीपुरवठा व स्वच्छता मंत्री तथा जळगाव जिल्ह्याचे पालकमंत्री गुलाबराव पाटील यांच्या संकल्पनेतून आणि माजी जिल्हा परिषद सदस्य प्रतापराव गुलाबराव पाटील यांच्या हस्ते ६०० पात्र लाभार्थ्यांना मोफत चष्म्यांचे वितरण करण्यात आले.

दृष्टीसोबत आत्मविश्वासाची भेट

GPS ग्रुपच्या सहकार्याने राबविण्यात येत असलेल्या या उपक्रमामुळे मोतीबिंदू शस्त्रक्रियेनंतर पात्र लाभार्थ्यांना मोफत चष्मे उपलब्ध करून देण्यात आले. त्यामुळे शेकडो नागरिकांना स्पष्ट दृष्टी मिळण्याबरोबरच दैनंदिन जीवन अधिक सुलभ होण्यास मदत झाली.

समाजहिताचा लोकाभिमुख उपक्रम

ग्रामीण भागातील नागरिकांना दर्जेदार आरोग्यसेवा उपलब्ध करून देण्याच्या उद्देशाने राबविण्यात येणारे हे अभियान मोठ्या प्रमाणावर प्रतिसाद मिळवत आहे. मोतीबिंदूमुळे दृष्टीदोष असलेल्या अनेक नागरिकांसाठी हा उपक्रम नवी आशा आणि नवसंजीवनी ठरत आहे.

GPS ग्रुपचे सहकार्य

या अभियानाच्या यशस्वी अंमलबजावणीसाठी GPS ग्रुपने मोलाचे सहकार्य केले. सामाजिक उत्तरदायित्वाच्या भावनेतून राबविण्यात आलेल्या या उपक्रमाचे लाभार्थी आणि नागरिकांनी स्वागत केले.

“आरोग्यदायी समाज घडविण्यासाठी प्रत्येक नागरिकाला उत्तम आरोग्यसेवा उपलब्ध करून देणे ही आमची प्राथमिकता आहे. ‘मोतीबिंदू मुक्त जळगाव ग्रामीण’ अभियानातून हजारो नागरिकांच्या आयुष्यात प्रकाश आणि नव्या आशेची किरणे पोहोचत आहेत.”
— गुलाबराव पाटील, पालकमंत्री, जळगाव जिल्हा