चोपड्यात भीषण अपघात; दोन सख्ख्या भावांचा मृत्यू
चोपडा : वर्डी येथील दोन सख्ख्या भावांचा दुचाकी अपघातात मृत्यू झाल्याची दुर्दैवी घटना घडली. टेमरया उर्फ रगन जगन बारेला (वय १८) आणि मगन जगन बारेला (वय ३०) अशी मृतांची नावे आहेत.
मिळालेल्या माहितीनुसार, दोघे भाऊ चोपडा येथून नवीन मोबाईल घेऊन दुचाकीवरून (एमएच १९ एव्ही ८५८२) घरी परतत होते. दरम्यान, माचला फाट्याजवळ त्यांच्या दुचाकीला भरधाव वेगाने येणाऱ्या क्रेटा कारने (एमएच ०४ एचएफ ८२९६) जोरदार धडक दिली.
या भीषण अपघातात मगन बारेला यांचा जागीच मृत्यू झाला, तर गंभीर जखमी टेमरया बारेला यांचा उपचारादरम्यान चोपडा उपजिल्हा रुग्णालयात मृत्यू झाला. या घटनेमुळे वर्डी गावात शोककळा पसरली असून कुटुंबीयांवर दु:खाचा डोंगर कोसळला आहे. पुढील तपास अडावद पोलिसांकडून सुरू आहे.
