जळगावात पोलिसांची विशेष नाकाबंदी; २१०० हून अधिक वाहनांची तपासणी
२.३८ लाखांचा दंड वसूल; मद्यपी चालक आणि टवाळखोरांवरही कडक कारवाई
जळगाव | प्रतिनिधी जिल्ह्यात कायदा व सुव्यवस्था अबाधित राखण्यासाठी आणि रस्ते सुरक्षा नियमांची प्रभावी अंमलबजावणी करण्यासाठी जळगाव जिल्हा पोलीस दलातर्फे शुक्रवारी रात्री विशेष नाकाबंदी मोहीम राबविण्यात आली. पोलीस अधीक्षक श्रीकांत धिवरे यांच्या मार्गदर्शनाखाली पार पडलेल्या या धडक कारवाईमुळे नियम मोडणाऱ्या वाहनधारकांचे धाबे दणाणले असून, काही तासांतच लाखो रुपयांचा दंड वसूल करण्यात आला आहे.
जिल्हाभर कडक तपासणी
२४ एप्रिल रोजी सायंकाळी ६ ते रात्री १०:३० या वेळेत ही मोहीम राबविण्यात आली. जिल्ह्यातील महत्त्वाच्या ५९ ठिकाणी नाकाबंदी करण्यात आली होती. यामध्ये ४८ अधिकारी आणि २१६ पोलीस अंमलदारांच्या पथकाने २१०० हून अधिक वाहनांची कसून तपासणी केली. जळगाव शहरासह भुसावळ, रावेर, चोपडा, चाळीसगाव आणि पाचोरा या उपविभागांमध्येही ही कारवाई एकाच वेळी करण्यात आली.
नियम मोडणाऱ्यांना दणका
या मोहिमेदरम्यान मोटार वाहन कायद्याचे उल्लंघन करणाऱ्या ३७४ वाहनधारकांवर गुन्हे नोंदवण्यात आले असून, त्यांच्याकडून एकूण २ लाख ३८ हजार ६५० रुपयांचा दंड वसूल करण्यात आला. रस्ते सुरक्षेला प्राधान्य देत पोलिसांनी मद्यप्राशन करून वाहन चालवणाऱ्या ५ चालकांविरुद्ध कठोर कारवाई केली आहे.
टवाळखोरांवरही पोलिसांची नजर
केवळ वाहतूक नियमांपुरतीच ही मोहीम मर्यादित न ठेवता, पोलिसांनी सार्वजनिक शांतता भंग करणाऱ्यांविरुद्धही कारवाईचा बडगा उगारला. सार्वजनिक ठिकाणी टवाळखोरी करणाऱ्या ४६ व्यक्तींवर प्रतिबंधात्मक कारवाई करण्यात आली, तर सार्वजनिक ठिकाणी मद्यप्राशन करणाऱ्या १३ जणांविरुद्ध १५ प्रकरणे नोंदवण्यात आली आहेत. एमआयडीसी, शनिपेठ, जिल्हापेठ आणि रामानंद नगर या भागांत पोलिसांनी विशेष लक्ष केंद्रित केले होते.
पोलीस प्रशासनाच्या या आक्रमक पवित्र्यामुळे गुन्हेगारी प्रवृत्तीवर आळा बसण्यास मदत होणार असून, नागरिकांनी वाहतूक नियमांचे पालन करून सहकार्य करावे, असे आवाहन पोलीस दलातर्फे करण्यात आले आहे.
“जिल्ह्यातील रस्ते सुरक्षा आणि शांतता राखण्यासाठी अशा प्रकारच्या मोहिमा सातत्याने राबविल्या जातील. नागरिकांनी विनाकारण फिरणे टाळावे आणि वाहतूक नियमांचे पालन करून पोलिसांना सहकार्य करावे. नियम मोडणाऱ्यांची गय केली जाणार नाही.”
— श्रीकांत धिवरे (पोलीस अधीक्षक, जळगाव)
