चोपडा बसस्थानक परिसरात चोरीच्या तयारीत असलेल्या टोळीचा पर्दाफाश !
जालन्यात कार्यरत पोलीस उपनिरीक्षकाचा सहभाग ; एलसीबी आणि चोपडा पोलिसांची कारवाई
चोपडा | प्रतिनिधी – चोपडा शहरातील बसस्थानक परिसरात चोरीच्या उद्देशाने फिरणाऱ्या एका संशयित टोळीचा स्थानिक गुन्हे शाखा (एलसीबी) आणि चोपडा पोलिसांच्या संयुक्त कारवाईत पर्दाफाश करण्यात आला आहे. या टोळीत जालना पोलीस दलातील एका सेवानिवृत्तीच्या उंबरठ्यावर असलेल्या पोलीस उपनिरीक्षकाचा सहभाग असल्याचे उघड झाल्याने पोलीस दलात एकच खळबळ उडाली आहे. बुधवार, १६ एप्रिल रोजी रचलेल्या सापळ्यात पोलिसांनी चार जणांना ताब्यात घेतले आहे.
सापळा रचून अटक
गुप्त माहितीच्या आधारे चोपडा पोलिसांनी बसस्थानक परिसरात सापळा रचला होता. एमएच ४३ २९२८ क्रमांकाच्या वाहनातून पळून जाण्याच्या प्रयत्नात असलेल्या संशयितांना धरणगाव नाका येथे अडवून अटक करण्यात आली. अटक करण्यात आलेले
या आरोपींमध्ये प्रल्हाद पिराजी मालटे (वय ५८, रा. सदर बाजार, जालना) कार्यरत पोलीस उपनिरीक्षक, जालना , श्रीकांत भिमराव बघे (वय २७, रा. गोपालनगर, खामगाव) , अंबादास सुखदेव साळगावकर (वय ४३, रा. माना, ता. मूर्तिजापूर, जि. अकोला) , रऊफ अहमद शेख (वय ४८, रा. महाळस, जि. बीड) , यांचा समावेश आहे. या आरोपींपैकी अंबादास साळगावकरवर यापूर्वी २७ चोरीचे गुन्हे नोंद असून, या टोळीच्या चौकशीतून आणखी अनेक गुन्हे उघड होण्याची शक्यता पोलिसांनी व्यक्त केली आहे.
या घटनेतील सर्वात धक्कादायक बाब म्हणजे प्रल्हाद मालटे हे सध्या कार्यरत असलेले पोलीस उपनिरीक्षक असून, ते आगामी तीन महिन्यांत सेवानिवृत्त होणार होते. ड्युटीवर असतानाच त्यांचा संबंध या टोळीशी आला आणि त्यांनी या टोळीत सहभाग घेतल्याचे उघड झाले आहे. त्यामुळे पोलीस दलाच्या विश्वासार्हतेला आणि प्रतिमेला जबर धक्का बसला आहे.
बसस्थानक परिसरात रचला चोरीचा कट
ही टोळी बसस्थानक परिसरात गर्दीचा फायदा घेत प्रवाशांचे दागिने आणि रोख रक्कम चोरी करण्याच्या तयारीत होती. याआधीच्या काही चोरीच्या घटनांमुळे पोलिसांनी संशय घेतला होता आणि त्याआधारे ही कारवाई करण्यात आली.
यांनी केली कारवाई
ही कारवाई चोपडा पोलीस निरीक्षक मधुकर साळवे आणि स्थानिक गुन्हे शाखेचे पो.उ.नि. गणेश वाघमारे यांच्या मार्गदर्शनाखाली पार पडली. कारवाई करणाऱ्या पथकात पो.उ.नि. जितेंद्र वल्टे, पोहेकॉ. विलेश सोनवणे, दिपक माळी, रवींद्र पाटील आणि पो.ना. हेमंत पाटील यांचा समावेश होता.
