इकरा शाहीन उर्दू हायस्कूलमध्ये हिंदी दिन उत्साहात साजरा
विविध शैक्षणिक उपक्रमांतून विद्यार्थ्यांनी सादर केले भाषण, कविता, पोस्टर व नाटक
जळगाव | प्रतिनिधी
मेहरूण येथील इकरा शाहीन उर्दू हायस्कूलमध्ये हिंदी दिन उत्साहपूर्ण वातावरणात विविध शैक्षणिक उपक्रमांनी साजरा करण्यात आला. यावेळी इयत्ता पाचवी ते दहावीच्या विद्यार्थ्यांनी उत्स्फूर्त सहभाग नोंदवत भाषणे, कविता, पोस्टर आणि नाटकांचे सादरीकरण केले.
विद्यार्थ्यांनी आपल्या सादरीकरणातून हिंदी भाषेचे महत्त्व, उपयुक्तता तसेच दैनंदिन जीवनातील तिच्या वापराबाबत उपस्थितांना माहिती दिली. कविता सादरीकरण, भाषणे आणि नाटकाच्या माध्यमातून विद्यार्थ्यांनी आपली प्रतिभा व सर्जनशीलतेचे प्रभावी दर्शन घडवले. तसेच आकर्षक पोस्टरच्या माध्यमातून हिंदी भाषेविषयीचे विचार सुंदर आणि कल्पक पद्धतीने मांडले.
हिंदी विभागप्रमुख शेख रोशन मुश्ताक यांनी विद्यार्थ्यांना मार्गदर्शन करताना हिंदी ही केवळ एक विषय नसून दैनंदिन जीवनात मोठ्या प्रमाणावर वापरली जाणारी जनमानसाची भाषा असल्याचे सांगितले. विद्यार्थ्यांनी हिंदीचा अधिकाधिक वापर करावा तसेच भाषेविषयी आवड निर्माण करावी, असे आवाहन त्यांनी केले.
कार्यक्रमाच्या तयारीसाठी हिंदी उपशिक्षक खान जुबेर बशीर, इमरान खान आणि उपशिक्षिका तरन्नुम मिर्झा यांनी विशेष परिश्रम घेतले. विद्यार्थ्यांना भाषण, कविता, पोस्टर आणि नाटकांच्या तयारीसाठी त्यांनी मार्गदर्शन व सहकार्य केले.
विद्यालयाचे मुख्याध्यापक शाह रियाझ अहमद जाफर शाह यांनी विद्यार्थ्यांना मार्गदर्शन करताना हिंदी भाषेच्या अध्ययनासोबतच तिच्या व्यावहारिक वापरावर भर दिला. विद्यार्थ्यांनी हिंदी भाषेविषयी आवड निर्माण करून आपल्या भाषिक प्रतिभेला सातत्याने विकसित करावे, असे त्यांनी सांगितले.
इकरा शिक्षण संस्थेचे अध्यक्ष डॉ. अब्दुल करीम सालार आणि सचिव एजाज अहमद मलिक यांनी हिंदी दिनानिमित्त विद्यार्थी, शिक्षक तसेच संपूर्ण विद्यालय परिवाराला शुभेच्छा दिल्या. विद्यार्थ्यांनी उत्स्फूर्तपणे केलेल्या सहभागाचे आणि त्यांच्या सर्जनशीलतेचे त्यांनी कौतुक केले.
विद्यार्थी आणि हिंदी विभागाच्या सामूहिक प्रयत्नांतून हिंदी दिनाचा कार्यक्रम ज्ञानवर्धक, प्रेरणादायी आणि उत्साहपूर्ण वातावरणात पार पडला.
