पहाटेच्या कॉम्बिंग ऑपरेशनने चाळीसगाव हादरले; ४४ जण ताब्यात, ३९ लाखांच्या आलिशान गाड्या जप्त
१९ तलवारी तसेच ११ चॉपर, चाकू व गुप्ती असा धारदार शस्त्रांचा मोठा साठा जप्त
चाळीसगाव | प्रतिनिधी
चाळीसगाव (विशेष प्रतिनिधी): जळगाव जिल्ह्यात कायदा व सुव्यवस्था अधिक मजबूत करण्यासाठी आणि गुन्हेगारी प्रवृत्तीवर नियंत्रण ठेवण्यासाठी पोलीस प्रशासनाने धडक कारवाईचा मार्ग अवलंबला आहे. याच पार्श्वभूमीवर बुधवार, २४ जून रोजी पहाटे २ ते ४ या वेळेत चाळीसगाव शहर पोलीस ठाणे हद्दीत विशेष कॉम्बिंग ऑपरेशन राबविण्यात आले. या कारवाईत ८० गुन्हेगारांची तपासणी करून ४४ जणांना ताब्यात घेण्यात आले असून ३९ लाख रुपये किमतीची तीन वाहने जप्त करण्यात आली आहेत. तसेच नवनाथ नगर परिसरात धारदार शस्त्रांचा मोठा साठा हस्तगत करण्यात आला आहे.
जिल्ह्यात कायदा व सुव्यवस्था अबाधित राखण्यासाठी आणि गुन्हेगारी प्रवृत्तीवर प्रभावी नियंत्रण मिळविण्यासाठी पोलीस प्रशासनाने विशेष मोहीम सुरू केली आहे. त्याचाच एक भाग म्हणून चाळीसगाव शहर पोलीस ठाण्याच्या हद्दीत अचानक कॉम्बिंग ऑपरेशन राबविण्यात आले.
धारदार शस्त्रांचा मोठा साठा जप्त
मिळालेल्या गोपनीय माहितीच्या आधारे नवनाथ नगर परिसरातील आरती किरण देठे (वय ३७ वर्षे) हिच्या घरावर पोलिसांनी छापा टाकला. या घरझडतीत १९ तलवारी तसेच ११ चॉपर, चाकू व गुप्ती असा धारदार शस्त्रांचा मोठा साठा जप्त करण्यात आला आहे. या शस्त्रांचा साठा कोणत्या उद्देशाने ठेवण्यात आला होता, याबाबत पोलीस पुढील तपास करत आहेत.
या कारवाईदरम्यान पोलिसांनी रेकॉर्डवरील ८० आरोपी व गुन्हेगारांची पडताळणी करत त्यांच्या घरांची झडती घेतली. यापैकी ४४ जणांना पुढील चौकशीसाठी पोलीस ठाण्यात आणण्यात आले.
ऑपरेशनदरम्यान शस्त्रास्त्र बाळगल्याप्रकरणी आर्म अॅक्ट कलम ४/२५ अन्वये दोन गुन्हे दाखल करण्यात आले. तसेच मुंबई पोलीस अधिनियम कलम १२४ अंतर्गत संशयास्पद आढळलेल्या तीन आलिशान वाहनांवर कारवाई करण्यात आली. यामध्ये एमएच-२० ईजे-४८९० क्रमांकाची वॅगनार, एमएच-१४ ईपी-७३५८ क्रमांकाची ऑडी आणि एमएच-४३ एआर-३४०९ क्रमांकाची वरना कार अशा सुमारे ३९ लाख रुपये किमतीच्या वाहनांचा समावेश आहे.
याशिवाय आठ पकड वॉरंटची यशस्वी बजावणी करण्यात आली. दारूबंदी कायद्यांतर्गत तीन प्रकरणांमध्ये कारवाई करून कच्चे रसायन नष्ट करण्यात आले, तर तीन जणांना समन्स बजावण्यात आले.
जिल्हा पोलीस अधीक्षक, अपर पोलीस अधीक्षक आणि उपविभागीय पोलीस अधिकारी यांच्या मार्गदर्शनाखाली ही मोहीम राबविण्यात आली. कारवाईत एक पोलीस निरीक्षक, एक सहाय्यक पोलीस निरीक्षक, पाच पोलीस उपनिरीक्षक, ६० पोलीस कर्मचारी, स्थानिक गुन्हे शाखेची पथके आणि तीन आरसीपी पथकांचा सहभाग होता.
गुन्हेगारी प्रवृत्तीच्या व्यक्तींवर वचक निर्माण करण्यासाठी आणि कायदा-सुव्यवस्था अधिक बळकट करण्यासाठी अशा विशेष मोहिमा यापुढेही सातत्याने राबविण्यात येणार असल्याचे पोलिसांनी स्पष्ट केले आहे
